वॉशिंग्टन : अमेरिकेची गुप्तचर संस्था एफबीआयने (एफबीआय) कुख्यात गँगस्टर सतिंदरजित सिंग उर्फ गोल्डी ब्रारचा समावेश आपल्या टॉप-१० मोस्ट वॉन्टेड गुन्हेगारांच्या यादीत केला आहे. त्याच्या अटकेसाठी उपयुक्त माहिती देणा-यास १० लाख डॉलर्सपर्यंतचे बक्षीस जाहीर केले आहे.
फेडरल ब्युरो ऑफ इन्व्हेस्टिगेशनने सोमवारी जारी केलेल्या सूचनेप्रमाणे गोल्डी ब्रार हा लॉरेन्स बिश्नोई ऑर्गनाईज्ड क्राईम ग्रुपचा उत्तर अमेरिकेतील लीडर म्हणून वॉन्टेड आहे. या ग्रुपचा संबंध अमेरिका आणि कॅनडामधील अनेक हिंसक गुन्ह्यांशी जोडला गेला असून गोल्डी ब्रारच्या अटकेस मदत करणा-या, माहिती देणा-यासाठी एफबीआयने तब्बल १० लाख यूएस डॉलर्स (सुमारे ८.३ कोटी रुपये) बक्षीस जाहीर केले.
लॉरेन्स बिश्नोई टोळीशी संबंध
अमेरिका आणि कॅनडामध्ये हिंसाचार पसरवणा-या लॉरेन्स बिश्नोई संघटित गुन्हेगारी टोळीशी गोल्डी ब्रारचा थेट सहभाग असल्याचा एफबीआयने आरोप केला आहे.
अत्यंत धोकादायक गुन्हेगार
एफबीआयने इशारा दिला आहे की, गोल्डी ब्रार हा सशस्त्र, अत्यंत धोकादायक आणि पळून जाण्यात सराईत आहे. त्याचा दक्षिण कॅलिफोर्निया आणि अमेरिका, कॅनडामध्ये विविध हिंसक कारवायांमध्ये कथितरित्या सहभाग आहे. एफबीआयने म्हटले आहे की, ही गुन्हेगारी टोळी राजकीय आणि धार्मिक व्यक्तींच्या हत्या, गोळीबार, अपहरण करणे, खंडणी मागणे, हल्ले करणे तसेच अमली पदार्थ व शस्त्रास्त्रांची तस्करी करणे यांसारख्या हिंसक कारवायांमध्ये सक्रियपणे सामील आहे. लॉस एंजेलिसमधील यूएस डिस्ट्रिक्ट कोर्टाने गोल्डी ब्रारसाठी फेडरल अटक वॉरंट जारी केल्याचे देखील म्हटले गेले आहे. गोल्डी ब्रार सध्या अमेरिकेत असून तो उत्तर अमेरिकेतील टोळीच्या कारवायांवर देखरेख करत असल्याचे अमेरिकन अधिका-यांचे म्हणणे आहे. ब्रारवर खंडणी मागणे, व्यापारात अडथळा आणणे, अमली पदार्थाची तस्करी वितरणाच्या उद्देशाने कट रचणे असे अनेक गंभीर आरोप आहेत.
