पुणे : प्रतिनिधी
सुटीसाठी अनेकदा राज्यातील लाखो पर्यटक प्रसिद्ध किल्ल्यांना भेट देतात. जेव्हा, मोठ्या सुट्ट्या असतात तेव्हा अनेकदा प्रचंड गर्दी किल्ल्यांवर पाहायला मिळते. मात्र, या गर्दीचे योग्य नियोजन आणि सुरक्षेची प्रभावी व्यवस्था नसल्याने पर्यटकांना असुरक्षिततेचा सामना करावा लागतो.
१५ऑगस्टचे औचित्य साधून पुण्यातील किल्ले सिंहगडावर फिरण्यास गेलेल्या एका कुटुंबाला मात्र वेगळाच अनुभव मिळाला. नुकतेच सोशल मीडियावर एक व्हिडीओ व्हायरल झाला, ज्यामध्ये सिंहगडावर दोन गटात राडा झाल्याचे पाहायला मिळाले. गर्दीचा गैरफायदा घेत काही तरुणांनी तरुणींशी असभ्य वर्तन केल्याचे प्रकार समोर आल्याने हा वाद झाला. या संपूर्ण घटनेने सिंहगडावरील पर्यटकांच्या सुरक्षेचा प्रश्न पुन्हा ऐरणीवर आला आहे.
स्वातंत्र्यदिनानिमित्त १५ ऑगस्टला सिंहगडावर पर्यटकांची मोठी गर्दी झाली होती. या गर्दीच्या तुलनेत सुरक्षा व्यवस्था अपुरी असल्याचे पाहायला मिळाले.
सुरक्षारक्षक किंवा पोलिसांची पुरेशी उपस्थिती नसल्याने गर्दीवर नियंत्रण ठेवण्यात अडचणी निर्माण झाल्याचेही यावेळी दिसून आले. मिळालेल्या माहितीनुसार, गर्दीचा फायदा घेतला तरुण महिला, मुली यांना चुकीच्या पद्धतीने स्पर्श केल्याचे समोर आले आहे. या घटनेचा जाब विचारला असता दोन गटांत वाद झाला आणि या वादाचे रुपांतर हाणामारीत झाल्याचे पाहायला मिळाले. विशेष म्हणजे सिंहगडावर हे सर्व घडत असताना परिस्थिती नियंत्रणात आणण्यासाठी तिथे पोलीस किंवा कोणतेही सुरक्षारक्षक नव्हते.
