लातूर : प्रतिनिधी
पुण्यश्लोक अहिल्यादेवी होळकर यांच्या लोककल्याणकारी कार्याला आणि प्रेरणादायी विचारांना अभिवादन करणारे लातूर शहराच्या अंबाजोगाई रोडवरील पू. अहिल्यादेवी होळकर चौक येथील पुण्यश्लोक अहिल्यादेवी होळकर यांच्या स्मारकाचे सुशोभीकरणाचे काम पूर्ण झाले आहे. लातूर जिल्हा मध्यवर्ती सहकारी बँकेच्या माध्यमातून साकारलेल्या या उपक्रमामुळे परिसराला नवे सौंदर्य, वैभव आणि ऐतिहासिक ओळख प्राप्त झाली आहे. सदर काम माजी मंत्री, सहकार महर्षी दिलीपराव देशमुख यांच्या मार्गदर्शनाखाली तसेच लातूर जिल्हा मध्यवर्ती सहकारी बँकेचे अध्यक्ष धिरज विलासराव देशमुख यांच्या पुढाकारातून पूर्ण करण्यात आले आहे.
या सुशोभीकरणामध्ये आकर्षक वास्तुरचना, देखणी प्रकाशयोजना आणि परिसराच्या सौंदर्यात भर घालणारे विविध घटक विकसित करण्यात आले आहेत. त्यामुळे हा परिसर आता लातूरकरांसाठी अभिमानाचे आणि आकर्षणाचे केंद्र ठरत आहे. शहरातील नागरिकांना तसेच बाहेरून येणा-या पाहुण्यांना पुण्यश्लोक अहिल्यादेवी होळकर यांच्या कार्याची प्रेरणा देणारे हे स्मारक सर्वांसाठी विशेष आकर्षण ठरणार आहे. या उपक्रमामुळे इतिहासाचा गौरव जपत विकासाची वाटचाल घडवून आणण्याचा प्रयत्न करण्यात आला आहे. पुण्यश्लोक अहिल्यादेवी होळकर यांच्या न्यायप्रिय, लोकाभिमुख आणि विकासाभिमुख कार्याची आठवण करून देणारे हे सुशोभीकरण भावी पिढ्यांसाठी प्रेरणास्थान ठरणार आहे. या उपक्रमाबद्दल नागरिकांकडून समाधान व्यक्त करण्यात येत असून, परिसराच्या सौंदर्यात भर घालणा-या या कामाचे सर्व स्तरांतून स्वागत होत आहे.
