लातूर : प्रतिनिधी
लातूर जिल्ह्यात अंमली पदार्थांची अवैध लागवड, साठवणूक व विक्री करणा-यांविरुद्ध कारवाई करण्याच्या अनुषंगाने शिरूर अनंतपाळ पोलिसांनी कारवाई करून उसाच्या शेतात लागवड केलेला गांजा जप्त केला आहे. या कारवाईत ८ किलो ६२० ग्रॅम गांजा, अंदाजे ४ लाख ३१ हजार रुपये किमतीचा मुद्देमाल जप्त करण्यात आला आहे.
सांगवी-घुगी येथील शेतशिवारातील सर्वे क्रमांक १२ मधील मधुकर बिरादार यांच्या उसाच्या शेतात गांजाची लागवड केल्याची बाब १८ ऑक्टोबर रोजी रात्री ८.२८ वाजण्याच्या सुमारास निदर्शनास आली. याप्रकरणी आरोपी मनोज मधुकर बिरादार, वय ३८, व्यवसाय शेती, रा. सांगवी-घुगी, ता. शिरूर अनंतपाळ, जि. लातूर याच्याविरुद्ध कायदेशीर कारवाई करण्यात आली. सदर ठिकाणाहून गांजाची झाडे उपटून दोन पोत्यांमध्ये भरलेला ८ किलो ६२० ग्रॅम गांजा मिळून आला. जप्त करण्यात आलेल्या गांजाची अंदाजे किंमत ४ लाख ३१ हजार रुपये आहे. याप्रकरणी पोलीस स्टेशन शिरूर अनंतपाळ येथे गुन्हा रजिस्टर क्रमांक ३३३/२०२६, कलम ८ (क), २० (ब)(्र्र)(ब), एनडीपीएस अधिनियम १९८५ अन्वये गुन्हा दाखल करण्यात आला आहे.सदर गुन्ह्याची फिर्याद परिविक्षाधीन पोलीस उपअधीक्षक तथा पोलीस स्टेशनचे प्रभारी अधिकारी अक्षय जाधव यांनी दिली असून, पुढील तपास पोलीस उपनिरीक्षक रायबोळे करीत आहेत.
