लातूर : प्रतिनिधी
येथील चन्नबसवेश्वर फार्मसी महाविद्यालय (डिग्री), येथे ‘हर घर दुर्गा’ अभियानांतर्गत दि. २२ ते २८ एप्रिल या कालावधीत ७ दिवसीय स्वसंरक्षण प्रशिक्षण शिबिर उत्साहात व यशस्वीरीत्या झाले. या शिबिरात महाविद्यालयातील विद्यार्थिनी मोठ्या संख्येने सहभाग नोंदवून स्वसंरक्षणाच्या विविध तंत्रांचे प्रशिक्षण घेतले.
या शिबिरासाठी प्रशिक्षक म्हणून तायक्वांदो असोसिएशन, लातूरचे मास्टर नेताजी जाधव, मास्टर धनश्री मदने आणि मास्टर जान्हवी मदने यांनी मार्गदर्शन केले. त्यांनी विद्यार्थिनींना दैनंदिन जीवनात उपयोगी पडणा-या स्वसंरक्षणाच्या विविध तंत्रांचे प्रात्यक्षिकांसह प्रशिक्षण दिले. तसेच संकटाच्या प्रसंगी धैर्याने व आत्मविश्वासाने कसे वागावे, याबाबतही मौलिक मार्गदर्शन करण्यात आले. ७ दिवस चाललेल्या या प्रशिक्षण शिबिरामुळे विद्यार्थिनींमध्ये आत्मविश्वास वाढण्यास मदत झाली असून, त्यांच्या शारीरिक व मानसिक सबलीकरणाला चालना मिळाली. कार्यक्रमाचा समारोप उत्साहपूर्ण वातावरणात करण्यात आला. एकूणच, हे स्वसंरक्षण प्रशिक्षण शिबिर विद्यार्थिनींसाठी अत्यंत उपयुक्त व प्रेरणादायी ठरले.
या कार्यक्रमासाठी प्राचार्य डॉ. विजयेंद्र स्वामी, उपप्राचार्य डॉ. अविनाश टेकाडे, नॅक समन्वयक डॉ. ओमप्रकाश भुसनुरे, आय.क्यू.ए.सी. समन्वयक डॉ. अनंत देशपांडे, डॉ. शिवराज नागोबा, डॉ. विवेक पंचभाई, डॉ. पद्मजा गिराम, डॉ. राम साखरे, डॉ. सुनील हिंडोळे, डॉ. नसीर शेख, कार्यक्रम समन्वयक प्रा. महेश मानके, डॉ. ऐश्वर्या इरल्लापल्ले, प्रा. अमोल नारागुडे, प्रा. अविनाश मठपती, प्रा. भीमाशंकर हुच्चे, शिवहर विभुते यांनी सहकार्य केले.
