यामी गौतमी-मामूट्टी सर्वोत्तम कलाकार; ७२ व्या राष्ट्रीय चित्रपट पुरस्कारांची घोषणा
नवी दिल्ली : वृत्तसंस्था
भारतीय चित्रपटसृष्टीतील सर्वात प्रतिष्ठित समजल्या जाणा-या ७२ व्या राष्ट्रीय चित्रपट पुरस्कारांची शनिवारी नवी दिल्लीत अधिकृत घोषणा करण्यात आली. माहिती आणि प्रसारण मंत्रालयाकडून जाहीर करण्यात आलेल्या या पुरस्कारांमध्ये यंदा आर्टिकल ३७० या चित्रपटाने बाजी मारत सर्वोत्तम चित्रपटाचा मान मिळवला तर अभिनय क्षेत्रातील उत्कृष्ट कामगिरीसाठी बॉलिवूड आणि साऊथच्या दिग्गज कलाकारांना राष्ट्रीय पुरस्काराने गौरवण्यात आले.
यंदाच्या पुरस्कारांमध्ये सर्वोत्कृष्ट अभिनेत्याचा बहुमान संयुक्तपणे जाहीर करण्यात आला असून, यामध्ये बॉलिवूडचा तरुण स्टार कार्तिक आर्यन आणि मल्याळम सिनेमाचे सुपरस्टार मामूट्टी यांनी इतिहास रचला तर आपल्या दमदार अभिनयाने प्रेक्षकांची मने जिंकणारी अभिनेत्री यामी गौतम हिला सर्वोत्कृष्ट अभिनेत्रीचा पुरस्कार जाहीर झाला.
यंदाच्या राष्ट्रीय चित्रपट पुरस्कारांमध्ये मराठी पाऊलही तितकेच खंबीर पडले असून मराठी सिनेसृष्टीचा डंका पाहायला मिळाला. यामध्ये मु.पो. बोंबिलवाडी या चित्रपटाला सर्वोत्कृष्ट मराठी चित्रपट म्हणून गौरवण्यात आले आहे. यासोबतच नुकत्याच गाजलेल्या घरत गणपती या चित्रपटातील रंगा गंधा या गाण्यासाठी अभय जोधपूरकर यांना सर्वोत्कृष्ट पार्श्वगायक म्हणून राष्ट्रीय पुरस्कार जाहीर झाला.
कार्तिक आर्यन आणि
मामूट्टी बेस्ट अॅक्टर
७२ व्या राष्ट्रीय चित्रपट पुरस्कारांमध्ये मल्याळम सुपरस्टार मामूट्टी यांना त्यांच्या ब्रमायुगम चित्रपटातील अंगावर काटा आणणा-या भूमिकेसाठी सर्वोत्कृष्ट अभिनेत्याचा पुरस्कार मिळाला. त्यांच्यासोबतच बॉलिवूड अभिनेता कार्तिक आर्यन याला चंदू चॅम्पियन चित्रपटातील त्याच्या कारकिर्दीतील सर्वोत्तम अभिनयासाठी संयुक्तपणे सर्वोत्कृष्ट अभिनेत्याचा राष्ट्रीय पुरस्कार प्रदान करण्यात आला.
यामी गौतम ठरली
सर्वोत्कृष्ट अभिनेत्री
आर्टिकल ३७० या चित्रपटात एका धाडसी गुप्तहेर अधिका-याची भूमिका साकारणारी अभिनेत्री यामी गौतम हिला सर्वोत्कृष्ट अभिनेत्रीचा पुरस्कार मिळाला आहे. या चित्रपटाचे दिग्दर्शन आदित्य जांभळे यांनी केले असून, या चित्रपटाला यंदाचा सर्वोत्कृष्ट चित्रपट म्हणून गौरविण्यात आले आहे. याशिवाय राजकुमार राव यांच्या मुख्य भूमिका असलेल्या श्रीकांत चित्रपटाला सर्वोत्कृष्ट हिंदी फीचर फिल्मचा पुरस्कार मिळाला.
