निलंगा : प्रतिनिधी
शेतीतील वाढता उत्पादन खर्च कमी करून शेतक-यांना आधुनिक तंत्रज्ञानाची साधने माफक दरात उपलब्ध करून देण्याच्या उद्देशाने माजी मंत्री तथा माजी पालकमंत्री आ. संभाजीराव पाटील निलंगेकर यांच्या विशेष सहकार्याने आणि युवा नेते अरविंद पाटील निलंगेकर यांच्या पुढाकारातून चार्जिंग बॅटरी फवारणी पंप व वॉटर फिल्टर वाटप उपक्रमाचा शुभारंभ करण्यात आला.
अध्यक्षस्थानी राजवीर संभाजीराव पाटील निलंगेकर हे होते. लातूर जिल्हा परिषद अध्यक्षा उषाताई पाटील तळेगावकर यांची प्रमुख उपस्थिती होती. त्यांच्या हस्ते मंगलबाई बिरादार, बंडू लव्हे, शिवाजी नाईकवाडे, तात्याराव पाटील व लक्ष्मण वाडीकर या पाच शेतक-यांना प्रातिनिधीक स्वरूपात फवारणी पंपाचे वितरण करून उपक्रमास सुरुवात झाली. हा उपक्रम पुढील आठ दिवस सुरू राहणार आहे. यावेळी उषाताई पाटील तळेगावकर यांनी शेतक-यांना आधुनिक शेतीची साधने परवडणा-या दरात उपलब्ध करून देणारा हा उपक्रम स्तुत्य असल्याचे सांगितले.
आधुनिक तंत्रज्ञानाच्या वापरामुळे उत्पादनवाढीस चालना मिळेल, असा विश्वास त्यांनी व्यक्त केला. नेप्च्यून फवारा कंपनीचे व्यवस्थापक प्रज्वल देशमुख यांनी फवारणी पंपाच्या वापराबाबत मार्गदर्शन केले. पूर्ण चार्ज केल्यानंतर ३५ ते ४० टाक्यांची फवारणी करता येते. तसेच बॅटरी व मोटारीत सहा महिन्यांत तांत्रिक दोष आढळल्यास संबंधित भाग बदलून देण्याची सुविधा असल्याची माहिती त्यांनी दिली. कार्यक्रमास व्यंकटराव धुमाळ, पंचायत समिती सभापती सुनिता वाघमारे, संजय सूर्यवंशी, अंकिता पाटील, नगराध्यक्ष संजयराज हालगरकर, माजी नगराध्यक्ष बाळासाहेब शिंगाडे यांच्यासह विविध पदाधिकारी, लोकप्रतिनिधी व शेतकरी उपस्थित होते. प्रास्ताविक संजय दोरवे यांनी केले तर सूत्रसंचालन शेषेराव ममाळे यांनी केले. निलंगा, शिरूर अनंतपाळ व देवणी तालुक्यातील शेतक-यांनी उपक्रमास उत्स्फूर्त प्रतिसाद दिला.
