नाशिक : प्रतिनिधी
देशातील वैद्यकीय शिक्षणासाठी अत्यंत महत्त्वाची मानली जाणारी ठएएळ परीक्षा यंदा मोठ्या वादात सापडली आहे. 3 मे रोजी झालेली परीक्षा रद्द करण्याचा निर्णय नॅशनल टेस्टिंग एजन्सीकडून घेण्यात आल्यानंतर संपूर्ण देशात खळबळ उडाली आहे.
नाशिक पोलिसांनी या प्रकरणी सांगितले की, प्रस्तुत प्रकरणात आज दुपारी १२ च्या सुमारास एका तरुणाला ताब्यात घेण्यात आले आहे. राजस्थान पोलिसांचे पथक येथे येणार आहे. ते येथे पोहोचल्यानंतर त्या तरुणाला त्यांच्या ताब्यात देण्यात येईल. संशयिताने आपले केस कापले होते. त्यामुळे त्याची ओळख पटवण्यात अडचण येत होती. पण तांत्रिक विश्लेषण व इतर गोष्टींच्या मदतीने पोलिसांनी त्याला ताब्यात घेतले. दुसरीकडे, सूत्रांनी सदर आरोपी बीएएमएस चे शिक्षण घेत असल्याचा दावा केला आहे. तसेच त्याची मेडिकल काउन्सलिंग एजन्सी असल्याचीही माहिती मिळत आहे. यातील पेपर हे नाशिकमधूनच प्रिंट करण्यात आले होते, असाही संशय व्यक्त केला जात आहे.
नाशिक येथील प्रश्नपत्रिका हरियाणात पोहोचली
तपास यंत्रणांच्या माहितीनुसार, नाशिकमध्ये बाहेर पडलेली प्रश्नपत्रिका पुढे हरियाणात पोहोचवण्यात आली. हरियाणामध्ये त्या प्रश्नपत्रिकेचे दहा वेगवेगळे सेट तयार करण्यात आल्याचे समोर आले आहे. यानंतर हे पेपर बिहार, आंध्र प्रदेश तसेच जम्मू-काश्मीरपर्यंत पोहोचल्याची धक्कादायक माहिती तपासात पुढे आली आहे. या संपूर्ण प्रकारामुळे परीक्षा प्रक्रियेत सहभागी असलेल्या संस्था, एजन्सी आणि सुरक्षा यंत्रणांच्या कार्यपद्धतीवर प्रश्नचिन्ह निर्माण झाले आहे. पेपर लीक होण्याची साखळी इतक्या मोठ्या प्रमाणात कशी कार्यरत होती, याचा शोध आता केंद्रीय तपास यंत्रणा घेत आहेत. या प्रकरणाचा तपास आता केंद्रीय अन्वेषण विभागाकडे म्हणजेच सीबीआयकडे सोपवण्यात आला आहे.
मनीष नावाचा संशयित जयपूरमधून अटक
तपासात आतापर्यंत समोर आलेल्या माहितीनुसार, जयपूरमधून अटक करण्यात आलेला मनीष नावाचा संशयित या संपूर्ण पेपरफुटीचा सूत्रधार असल्याचा संशय व्यक्त केला जात आहे. तपास अधिका-यांच्या मते, प्रश्नपत्रिका अधिकृतरीत्या छापली जाण्यापूर्वीच संभाव्य प्रश्नांची माहिती त्याने मिळवली होती. त्यानंतर संगनमताने प्रश्नपत्रिका बाहेर काढून ती विविध राज्यांमध्ये पोहोचवण्यात आल्याची शक्यता तपासली जात आहे. या संपूर्ण नेटवर्कमध्ये आणखी किती जण सहभागी आहेत, याचाही शोध सीबीआय घेत आहे.
