नाशिक : प्रतिनिधी
नाशिक शहरातील एका नामांकित कंपनीत महिला कर्मचा-यांच्या छळवणूक आणि धर्मांतराच्या प्रकरणात मोठा ट्विस्ट समोर आला आहे. या प्रकरणात निदा खान हीच मुख्य सूत्रधार असल्याचा धक्कादायक उलगडा पोलिस तपासात झाला आहे.
पोलिसांनी निदा खानच्या अटकेसाठी तीन स्वतंत्र पथके तयार केली असून ती विविध ठिकाणी शोधमोहीम राबवत आहेत. तरीही तिचा ठावठिकाणा लागत नसल्याने तपास यंत्रणांसमोर मोठे आव्हान उभे राहिले आहे. कंपनीत ऑपरेशन विभागात मॅनेजर आणि टीम लीडर म्हणून काम पाहणारी निदा खानच या सर्व घडामोडींच्या केंद्रस्थानी असल्याचे समोर आले आहे.
तपासात उघड झालेल्या माहितीनुसार, कंपनीतील कामाच्या मीटिंगच्या माध्यमातून काही महिलांना लक्ष्य केले जात होते. विशेषत: हिंदू तरुणींना वेगळे करून त्यांच्यावर मानसिक दबाव आणला जात होता. त्यांना धर्मांतरासाठी भाग पाडण्याचे प्रयत्न केले जात होते. विरोध करणा-या महिलांना मानसिक तसेच लैंगिक छळाला सामोरे जावे लागत असल्याचेही समोर आले आहे. या सर्व कारवायांमध्ये निदा खान सक्रियपणे भूमिका बजावत असल्याचे पोलिसांना आढळले आहे.
या प्रकरणात अटक करण्यात आलेल्या कंपनीच्या एचआर अधिकारी अश्विनी चैनानी हिच्या चौकशीतूनही अनेक महत्त्वाचे धागेदोरे समोर आले आहेत. तिच्या जबाबातून निदा खानच या संपूर्ण प्रकारामागील प्रमुख व्यक्ती असल्याचे स्पष्ट झाले आहे. सहा पुरुष आणि दोन महिला आरोपींचा समावेश असलेल्या या प्रकरणात एक व्हॉट्सऍप ग्रुप तयार करून कारवाया राबवल्या जात असल्याचा धक्कादायक खुलासा झाला आहे. त्यामुळे या प्रकरणात मोठे आणि संघटित रॅकेट कार्यरत असल्याचा संशय व्यक्त होत आहे.
निदा खानविषयी मिळालेल्या माहितीनुसार, ती वयाच्या २६ व्या वर्षीपासून कंपनीत टीम लीडर म्हणून काम करत होती. २०२१ पासून ती कंपनीत कार्यरत होती. नाशिकच्या द्वारका परिसरात तिचे माहेर असून तिचे पती एका खासगी कंपनीत नोकरी करत असल्याची माहिती आहे. नव्याने नोकरीला लागलेल्या महिलांना प्रशिक्षण देण्यासाठी तीच शिफारस करत असे आणि त्यातूनच त्यांना या जाळ्यात ओढले जात असल्याचा आरोप आहे. आर्थिक व्यवहारांमध्येही तिचा सहभाग असल्याचे समोर येत आहे.
आंतरराष्ट्रीय संबंध उघड होण्याची शक्यता
दरम्यान, या संपूर्ण प्रकरणाचा उलगडा होण्यासाठी निदा खानची अटक अत्यंत महत्त्वाची मानली जात आहे. तिच्या अटकेनंतर या रॅकेटमागील खरे सूत्रधार आणि संभाव्य आंतरराष्ट्रीय संबंध उघड होण्याची शक्यता व्यक्त केली जात आहे. तपास यंत्रणांनी तिचे आंतरराष्ट्रीय नेटवर्क असण्याचाही संशय व्यक्त केला आहे. त्यामुळे नाशिक पोलिसांसाठी हे प्रकरण अधिक गंभीर बनले असून पुढील काही दिवसांत आणखी मोठे खुलासे होण्याची शक्यता वर्तवली जात आहे.
