नवी दिल्ली : वृत्तसंस्था
सर्वोच्च न्यायालयाने अयोध्या राम मंदिरातील देणगी चोरी प्रकरणात उत्तर प्रदेश सरकार, केंद्र सरकार आणि श्री राम जन्मभूमी तीर्थ क्षेत्र ट्रस्ट यांना नोटीस बजावली. उत्तर प्रदेश सरकारला सद्यस्थितीचा अहवाल सादर करण्यास सांगण्यात आले असून, त्यात एसआयटीच्या तपास अधिका-यांचा तपशील समाविष्ट करण्यास सांगितले आहे. न्यायालयाने या प्रकरणाशी संबंधित सीसीटीव्ही फुटेज जतन करण्याचे निर्देशही दिले.
राम मंदिरातील चोरीच्या चौकशीसाठी एसआयटी स्थापन झाल्याचे वृत्त आहे.
त्यामुळे आम्ही उत्तर प्रदेश सरकारने स्थापन केलेल्या एसआयटीला सद्यस्थितीचा अहवाल सादर करण्याचे निर्देश देतो. हे प्रकरण पुढील सोमवारी पुढील विचारार्थ सूचीबद्ध केले जावे. सॉलिसिटर जनरल म्हणाले की, आम्ही तो एका सीलबंद लिफाफ्यात सादर करू. न्यायालयाने म्हटले की, सद्यस्थितीच्या अहवालात एसआयटीच्या स्थापनेचा संपूर्ण तपशील असावा. याचिकाकर्त्यांच्या वकिलाने सुचवले की, सद्यस्थितीचा अहवाल याचिकाकर्त्यांना दिला जाऊ शकतो. यावर सरन्यायाधीश म्हणाले की, आम्ही त्यावर नंतर विचार करू. तपास सुरू आहे.
सुनावणी सुरू होताच याचिकाकर्त्यांच्या वकिलाने सांगितले की, एक एसआयटी स्थापन करण्यात आली आहे. काही घडामोडी झाल्या आहेत. सीसीटीव्ही फुटेज आणि इतर साहित्य नष्ट केले जाऊ शकते. सरन्यायाधीश सूर्यकांत यांनी उत्तर दिले की, तुमची ऊर्जा वाचवा. तुम्हाला तिची बाहेरही गरज लागेल. केंद्र सरकारचे प्रतिनिधित्व करणारे सॉलिसिटर जनरल तुषार मेहता यांनी आम्ही राज्याचे प्रतिनिधित्व करत आहोत. नोटीस आवश्यक नसेल किंवा ती केवळ राज्य अधिका-यांपुरती मर्यादित ठेवली जाऊ शकते.
सीलबंद लिफाफ्यात
अहवाल सादर करणार
सरकारचे प्रतिनिधित्व करणारे सॉलिसिटर जनरल तुषार मेहता यांनी सांगितले की, सद्यस्थितीचा अहवाल एका सीलबंद लिफाफ्यात सादर केला जाईल. अहवालात एसआयटीची स्थापना आणि रचनेचा संपूर्ण तपशील असावा, असे न्यायालयाने स्पष्ट केले. यानंतर न्यायालयाने पुढील सुनावणी २० जुलै रोजी निश्चित केली आहे.
३ स्वतंत्र याचिकांवर
सुप्रीम कोर्टात सुनावणी
सरन्यायाधीश सूर्यकांत यांच्या अध्यक्षतेखालील खंडपीठ तीन स्वतंत्र याचिकांवर सुनावणी करत होते. या याचिकांमध्ये तपास सीबीआयकडे हस्तांतरित करण्याची, तसेच मंदिरातील देणग्यांच्या व्यवस्थापनाशी संबंधित विविध बाबींचा आढावा घेण्यासाठी तज्ज्ञ समिती स्थापन करण्याची मागणी करण्यात आली होती.
८ आरोपींच्या कोठडीत वाढ
अयोध्येतील राम मंदिर देणगी चोरी प्रकरणात अटक केलेल्या सर्व ८ आरोपींना व्हीडिओ कॉन्फरन्सिंगद्वारे न्यायालयासमोर हजर करण्यात आले. त्यांची पोलिस कोठडी आज संपल्याने हजर केले. यावेळी व्हीडीओ कॉन्फरन्सिंगद्वारे सुनावणी होऊन आठही आरोपींना २७ जुलैपर्यंत कोठडीत वाढ केली. आरोपींमध्ये मंदिर ट्रस्टचे माजी सरचिटणीस चंपत राय यांचे निकटवर्तीय रामशंकर यादव उर्फ टिन्नू आणि नैवेद्याची मोजणी करण्याची जबाबदारी असलेले सुभाष श्रीवास्तव याच्यासह आठही आरोपींच्या पोलिस कोठडीत वाढ करण्याची मागणी पोलिसांनी केली. त्यावर कोर्टाने २७ जुलैपर्यंत पोलिस कोठडी वाढविली आहे.
