परभणी : ऑनलाईन औषधी विक्रीच्या विरोधात कठोर कारवाई करण्यात यावी. विना प्रिस्क्रीप्शन व होमडिलीव्हरी औषध पुरविण्याची सेवा पूर्णत: बंद करण्यात यावी. जीएसआर ८१७ (इ), जीएसआर (इ) २२०ला तात्काळ वापस घेण्याच्या मागणीसाठी परभणी जिल्हा केमिस्ट अॅन्ड ड्रगीस्ट असोसिएशनच्या वतीने मोर्चा काढण्यात आला. तसेच या विरोधात बुधवार, दि.२० रोजी पुकारलेल्या बंदमध्ये जिल्ह्यातील १८०० औषधी दुकान विक्रेत्यांनी सहभाग नोंदविला होता. त्यामुळे शहरातील संपूर्ण औषधी दुकान बंद होते. त्यामुळे रूग्णांसह त्यांच्या नातेवाईकांना मात्र औषधीसाठी धावपळ करण्याची वेळ आली.
या संदर्भात मुख्यमंत्री यांना पाठविण्यात आलेल्या निवेनात नमूद करण्यात आले आहे की, ऑनलाईन माध्यमातून मोठी सूट देऊन औषध विक्री करण्यात येत आहे. औषधांच्या किंमती आवश्यकतेपेक्षा कमी ठेवण्याच्या धोरणाला प्रतिबंध लावण्या यावा आदी मागण्या या निवेदनात करण्यात आल्या आहेत. या पार्श्वभुमीवर नागरिकांचे हीत आणि रूग्णांच्या सुरक्षेसाठी वरील मुद्यांवर तात्काळ कारवाई करण्याची मागणी या निवेदनात करण्यात आली आहे.
परभणी जिल्हा केमिस्ट अॅन्ड ड्रगीस्ट असोसिएशनच्या वतीने काढण्यात आलेल्या मोर्चात पदाधिकारी, सदस्य, औषधी विक्रेते मोठ्या संख्येने सहभागी झाले होते. छ. शिवाजी महाराज यांच्या पुतळा परिसरात संघटनेच्या पदाधिका-यांनी आपले मनोगत व्यक्त करीत ऑनलाईन औषधी विक्रीच्या विरोधात तीव्र संताप व्यक्त केला. या संदर्भात प्रशासनाला देण्यात आलेल्या निवेदनावर संघटनेचे अध्यक्ष संजय मंत्री, सचिव सुर्यकांत हाके यांची स्वाक्षरी आहे.
