पाथरी : शहराची अहोरात्र स्वच्छता राखणा-या सफाई कामगारांचे मागील ७ महिन्यांपासून वेतन मिळाले नाही. या कर्मचा-यांवर वेतनाअभावी उपासमारीची वेळ आली आहे. या प्रकरणी तातडीने लक्ष देऊन कर्मचा-यांचे वेतन अदा करावे अशी मागणी होत आहे.
शहरातील नगरपरिषदेचे सफाई कामगार अत्यंत प्रामाणिकपणे पाथरी शहराच्या स्वच्छतेमध्ये आणि साफसफाईच्या कामात योगदान देत आहेत. मात्र, गेल्या ७ महिन्यांपासून त्यांना वेतन मिळालेले नाही. वेळेवर पगार होत नसल्यामुळे या कर्मचा-यांसमोर कुटुंबाच्या उदर्निवाहाचा प्रश्न निर्माण झाला आहे. या गंभीर समस्येकडे पाथरी नगरपालिकेचे मुख्याधिकारी आणि नगराध्यक्ष यांनी गांभीर्याने लक्ष द्यावे अशी मागणी सफाई कर्मचा-यांकडून होत आहे.
शहरातील स्वच्छता कर्मचा-यांचे ७ महिन्यांचे वेतन थकीत असल्याने त्यांना अनेक अडचणींचा सामना करावा लागत आहे. वरीष्ठ अधिका-यांनी तात्काळ याकडे लक्ष देऊन न्याय द्यावा अशी मागणी संबंधीत कर्मचा-यांनी केली आहे. सफाई कर्मचा-यांची ही आर्त हाक नगरपरिषदेच्या कर्मचा-यांना ऐकू जाते का याकडे आता सर्वांचे लक्ष लागले आहे.
