अकोला : प्रतिनिधी
शहरातील अत्यंत गजबजलेला मध्यवर्ती भाग असलेल्या रामदासपेठ परिसरातील ‘सिटी हॉस्पिटल’ला आज अचानक भीषण आग लागल्याची धक्कादायक घटना घडली. ज्या वेळी ही आग भडकली, तेव्हा या रुग्णालयात विविध आजारांवर उपचार घेणारे अनेक रुग्ण दाखल होते.
आगीची माहिती मिळताच रुग्णालय प्रशासन, सुरक्षा रक्षक आणि स्थानिक नागरिकांनी तातडीने रुग्णांना सुरक्षितपणे बाहेर काढण्यासाठी युद्धपातळीवर बचावकार्य सुरू केले.
घटनेचे गांभीर्य ओळखून अग्निशमन दलाला त्वरित पाचारण करण्यात आले असून, त्यांच्या गाड्या घटनास्थळी दाखल झाल्या आहेत आणि आग विझविण्याचे शर्थीचे प्रयत्न सुरू आहेत. या बचावकार्यात अतिदक्षता विभाग आणि जनरल वॉर्डमधील गंभीर रुग्णांना प्राधान्याने सुरक्षित स्थळी हलवण्यावर विशेष भर दिला जात आहे.
दरम्यान, या रुग्णालयाला आग नेमकी कशामुळे लागली, याचे निश्चित कारण अद्याप स्पष्ट होऊ शकलेले नाही. ही आग शॉर्ट सर्किटमुळे लागली की यामागे अन्य काही कारण आहे, हे तपासाअंतीच समोर येऊ शकेल. या दुर्घटनेच्या वृत्तामुळे अकोला शहरात चिंतेचे वातावरण निर्माण झाले असून, आपल्या रुग्णांच्या सुरक्षेच्या काळजीपोटी नातेवाईकांनी आणि परिसरातील नागरिकांनी ‘सिटी हॉस्पिटल’बाहेर मोठ्या संख्येने गर्दी केली आहे.
