नवी दिल्ली : लोकसभेची लिटमस टेस्ट समजल्या जाणाऱ्या ५ राज्यांचा निकाल निकाल रविवारी आणि सोमवारी जाहीर होणार आहे. रविवारी सकाळपासून ४ राज्यांच्या मतमोजणीला सुरवात होणार असून सोमवारी मिझोरामची मतमोजणी केली जाणार आहे. तसेच कोणत्या राज्यात कोण बाजी मारेल याचा अंदाजही (एक्झिट पोल) जाहीर झाला आहे. परंतु राज्याभिषेक कुणाचा होणार हे रविवारी संध्याकाळपर्यंत कळणार आहे. या पार्श्वभूमीवर निकालापूर्वीच फोडाफोडीचे राजकारण सुरु होण्याची चिंता तज्ञ वर्तवत आहेत. दरम्यान, यावेळी काँग्रेस पक्ष सावध झाला असून घोडेबाजार होऊ नये म्हणून काँग्रेसने आपल्या उमेदवारांना सुरक्षित ठिकाणी नेण्याच्या हालचाली सुरु केल्या आहेत.
सर्वच राजकीय पक्ष आपापल्या विजयाचा दावा करत आहेत, मात्र त्याचवेळी निवडणुकीच्या निकालापूर्वीच फोडाफोडीचे राजकारणही सुरू झाले आहे. मिळालेल्या माहितीनुसार, राजस्थानमध्ये काँग्रेसने जवळपास १२ बंडखोर आणि अपक्ष उमेदवारांशी संपर्क साधला आहे. तसेच विधानसभा निवडणुकीच्या निकालापूर्वी भारतीय जनता पक्षाच्या छावणीत खळबळ उडाली आहे. माजी मुख्यमंत्री वसुंधरा राजे यांनी राष्ट्रीय स्वयंसेवक संघाच्या नेत्यांची भेट घेतली आहे. राजस्थानचे राज्यपाल राज्य मिश्रा यांच्या रविवारी होणाऱ्या बैठकीबाबत राजकीय वर्तुळात अनेक चर्चा रंगल्या आहेत. अनेक पक्षांनी शनिवारी मंदिरांमध्येही पूजाअर्चा केली आहे. दरम्यान, राज्यसभा खासदार किरोरी लाल मीणा यांनी दावा केला आहे की, काँग्रेसने मोठ्या बंदसाठी बेंगळुरूमध्ये रिसॉर्ट बुक केले आहे.
मध्य प्रदेश, छत्तीसगड, राजस्थान आणि तेलंगणा या चार राज्यांमध्ये आपले सरकार स्थापन होणार असल्याचा काँग्रेसचा दावा आहे. तसेच काँग्रेस नेते प्रमोद तिवारी यांनी मिझोराममध्ये आघाडी सरकार स्थापन करणार असल्याचा दावा केला. भाजपनेही वीज़याचा दावा केला आहे. या स्थितीत पक्षाची वॉर रूमही सक्रिय झालेली दिसत आहे.
मुख्यमंत्र्यांनी संपर्क साधला
कर्नाटकचे उपमुख्यमंत्री आणि काँग्रेसचे ज्येष्ठ नेते डीके शिवकुमार यांनी शनिवारी माध्यमांना सांगितले की, आमचा पक्ष तेलंगणात सहज विजय मिळवेल असा आम्हाला विश्वास आहे. आम्हाला अडकवण्याचा प्रयत्न केला जात आहे, हेही आम्हाला माहीत आहे. आमच्या उमेदवारांनी सांगितले की मुख्यमंत्र्यांनी त्यांच्याशी संपर्क साधला आहे पण काळजी करण्याची गरज नाही.
मोठ्या पक्षांनी संपर्क वाढवला
एक्झिट पोलच्या आकडेवारीवरून प्रमुख राजकीय पक्षसावध झाले आहेत. मीडिया रिपोर्ट्सनुसार, शुक्रवारपासून भारतीय जनता पक्ष आणि काँग्रेसचे प्रमुख नेते आपापल्या पक्षांचे बंडखोर, अपक्ष उमेदवार आणि छोट्या राजकीय पक्षांच्या संपर्कात आहेत. यावेळी दोन्ही पक्षांना बहुमताचा जादुई आकडा गाठण्यासाठी बाहेरून मदत घ्यावी लागणार असल्याचे मानले जात आहे.
