कोलकाता : बंगालमधील सत्ताधारी पक्ष टीएमसीने लोकसभा निवडणुकीसाठी आपला जाहीरनामा प्रसिद्ध केला आहे. पक्षाचे नेते खासदार डेरेक ओब्रायन यांच्यासह अनेक ज्येष्ठ नेत्यांनी टीएमसीचा जाहीरनामा बुधवारी प्रसिद्ध केला. पक्षाच्या जाहीरनाम्यात बंगालमध्ये एनआरसी लागू होऊ देणार नाही, असे स्पष्टपणे सांगण्यात आले आहे.
टीएमसीने सोशल मीडियावर पोस्ट करून लिहिले की, मुख्यमंत्री ममता दीदींच्या शपथेने आम्ही प्रत्येक भारतीयाला रोजगार, सर्वांना घर, मोफत एलपीजी सिलिंडर, शेतक-यांना एमएसपी, एससी-एसटी आणि ओबीसी विद्यार्थ्यांना शिष्यवृत्ती देण्याची शपथ घेतो. आम्ही सर्व मिळून भाजपच्या जमीनदारांना उखडून टाकू आणि सर्वांना सन्मान देऊ, असे टीएमसीने म्हटले आहे. संपूर्ण देशात कुठेही समान नागरी संहिता लागू होणार नाही, असे आश्वासन टीएमसीने आपल्या जाहीरनाम्यात म्हटले आहे.
टीएमसीच्या जाहीरनाम्यातील महत्त्वाचे मुद्दे
सर्व जॉब कार्डधारकांना १०० दिवसांची रोजगार हमी आणि कामगारांना प्रतिदिन किमान ४०० रुपये वेतन देण्याचे आश्वासन दिले आहे.
सर्व बीपीएल कुटुंबांना दरवर्षी १० मोफत एलपीजी सिलिंडर दिले जातील.
सर्व शिधापत्रिकाधारकांना दरमहा पाच किलो रेशन मोफत दिले जाईल. तसेच, रेशन लोकांपर्यंत घरपोच पोहोचवले जाईल आणि त्यासाठी कोणतेही शुल्क आकारले जाणार नाही.
एससी, एसटी आणि ओबीसी विद्यार्थ्यांना उच्च शिक्षणासाठी देण्यात येणा-या शिष्यवृत्तीत वाढ करण्यात येणार आहे.
६० वर्षांपेक्षा जास्त वयाच्या वृद्धांना दरमहा १ हजार रुपये पेन्शन दिली जाईल.
टीएमसीच्या जाहीरनाम्यात स्वामीनाथन आयोगाच्या शिफारशींच्या आधारे शेतक-यांना एमएसपी देण्यात येईल. पिकाच्या सरासरी खर्चापेक्षा पन्नास टक्के जास्त एमएसपी दिला जाईल, असे आश्वासन देण्यात आले आहे.
पेट्रोल, डिझेल आणि एलपीजी सिलिंडरच्या किमती कमी केल्या जातील आणि किमतीतील सतत होणा-या चढ-उतारावर मात करण्यासाठी टाळण्यासाठी किंमत स्थिर निधी उपलब्ध केला जाईल.
विद्यार्थ्यांना उच्च शिक्षणासाठी १० लाख रुपयांपर्यंत क्रेडिट कार्ड मर्यादा दिली जाईल. तसेच, सर्व पदवीधर आणि डिप्लोमाधारकांना २५ वर्षांसाठी दरमहा शिकाऊ प्रशिक्षण दिले जाईल, अशी आश्वासने टीएमसीने १८ व्या लोकसभेच्या जाहीरनाम्यात दिली आहेत.
