नवी दिल्ली : कर्नाटकचे माजी मुख्यमंत्री आणि भाजपचे ज्येष्ठ नेते बीएस येडियुरप्पा यांचे पुत्र बीवाय विजयेंद्र यांच्याकडे कर्नाटक भाजपची कमान सोपवण्यात आली आहे. पक्षाच्या राज्य युनिटच्या अध्यक्षपदी त्यांची नियुक्ती करण्यात आली आहे. त्यांनी भाजप नेते नलिनकुमार कटील यांची जागा घेतली आहे. विजयेंद्र यांना २०२० मध्ये भाजपच्या कर्नाटक युनिटचे उपाध्यक्ष म्हणून नियुक्त करण्यात आले होते.
भाजपचे राष्ट्रीय सरचिटणीस अरुण सिंह यांनी शुक्रवारी (१० नोव्हेंबर) जारी केलेल्या निवेदनानुसार, भाजपचे राष्ट्रीय अध्यक्ष जेपी नड्डा यांनी आमदार विजयेंद्र येडियुरप्पा यांची कर्नाटक भाजप अध्यक्षपदी नियुक्ती केली आहे. ही नियुक्ती तत्काळ प्रभावाने लागू होणार असल्याचे निवेदनात म्हटले आहे.
कर्नाटक भाजपच्या वतीने त्यांचे अभिनंदन करण्यात आले आहे. एका पोस्ट मध्ये कर्नाटक भाजपने म्हटले की, शिकारीपूर विधानसभा मतदारसंघाचे आमदार बीवाय विजयेंद्र यांची कर्नाटक भाजप प्रदेशाध्यक्षपदी नियुक्ती करण्यात आली आहे, त्यांचे अभिनंदन. त्यांच्या नेतृत्वाखाली पक्ष राज्यात अधिक संघटित आणि मजबूत होईल.
४७ वर्षीय बीवाय विजयेंद्र यांना त्यांचे वडील बीएस येडियुरप्पा यांचे राजकीय उत्तराधिकारी म्हणून पाहिले जाते. भाजपमध्ये एक कुशल संघटनात्मक नेता म्हणूनही विजयेंद्र यांच्याकडे पाहिले जाते. भाजप प्रदेशाध्यक्षपदी त्यांची नियुक्ती झाल्यामुळे अनेक महिन्यांच्या अटकळांना पूर्णविराम मिळाला कारण कर्नाटक निवडणुकीत काँग्रेसचा पराभव झाल्यानंतर भाजप या पदासाठी नवीन अध्यक्ष शोधत होता.
